WhatsApp po u mundëson përdoruesve të përkthejnë mesazhet në gjuhën që dëshirojnë.

Tani, nëse përdoruesit marrin mesazhe në një gjuhë tjetër, mund ta mbajnë shtypur dhe të klikojnë “Përkthe”. Përdoruesit mund të përzgjedhin gjuhën dhe ta shkarkojnë që ta përdorin edhe në të ardhmen. Opsioni është i mundur në të gjitha bisedat.

Përdoruesit e Android kanë mundësinë për të aktivizuar përkthimin automatik për një bisedë të tërë që mesazhet vijuese të jenë të përkthyera.

Kompania thekson se përkthimi ndodh në pajisjen e përdoruesit dhe WhatsApp nuk mund ta shohë, duke ruajtur enkriptimin e mesazheve.

“Me më shumë se 3 miliardë përdorues në 180 shtete, ne punojmë gjithnjë që përdoruesit tanë të jenë të lidhur ngushtë, pavarësisht ku ndodhen. Por ne e kuptojmë se ndonjëherë gjuha mund të jetë pengesë për të bërë gjëra apo për të shprehur si ndihesh në të vërtetë. Ndaj ne jemi entuziastë që po sjellim përkthimet e mesazheve në WhatsApp që të komunikoni më lehtë në gjuhë të ndryshme”, tha platforma në një shkrim.

Përkthimi i mesazheve ka nisur të aplikohet që prej së martës si për përdoruesit Android, ashtu edhe iOS.

Në Android janë të disponueshme gjashtë gjuhë: anglisht, spanjisht, hindi, portugalisht, rusisht dhe arabisht.

Në iPhone ka më shumë opsione: arabisht, holandisht, anglisht, frëngjisht, gjermanisht, hindi, indonezisht, italisht, japonisht, korean, mandarin, polonisht, portugalisht, rusisht, spanjisht, tajlandisht, turqisht, ukrainisht dhe vietnamisht.

Nuk dihet ende se kur opsioni do të jetë i disponueshëm në versionin web apo Windows dhe Mac.