James Rubin, ish-ndihmëssekretari amerikan i Shtetit në kohën e luftës së Kosovës, ka rrëfyer para Gjykatës Speciale për një episod të rëndësishëm, bisedën telefonike mes ish-sekretares amerikane Medeline Albright dhe Adem Demaçit, simbolit të rezistencës kosovare.

Avokati i Hashim Thaçit, Luka Mishetiq, e pyeti Rubinin nëse i kujtohej kjo bisedë, duke theksuar se Albright kishte kontaktuar Demaçin pas Rambujesë, pasi besohej se ai kishte ndikim te Thaçi.

“Po,” u përgjigj Rubin, duke shtuar:
“Kam qenë i pranishëm kur sekretarja Albright thirri në telefon Adem Demaçin. Më kujtohet shumë mirë. Na u duk si një person që kishte autoritet, jo autoritet fizik apo vertikal, por ideologjik. Hashim Thaçi mendonte se kishte nevojë për një person si Adem Demaçi që ta ndihmonte në shtyrjen e çështjes së pavarësisë. Thaçi thoshte: jo pavarësi tani, por më vonë. Ai donte të tregonte se pavarësia mund të diskutohej në një fazë tjetër. Ndërsa Demaçi ishte më radikal: ‘o pavarësi, o le të vdesim.’”

Rubin theksoi se Demaçi kishte një rol të veçantë brenda UÇK-së në atë kohë, duke ofruar mbështetje ideologjike për Thaçin dhe ekipin e tij.

“Adem Demaçi ishte eprori i tij nga pikëpamja ideologjike në këtë grup. Jo se ishte përgjegjës direkt, por Thaçi kishte nevojë për mbështetje nga themeluesi ose figura kryesore ideologjike,” shtoi Rubin./Gazeta Infokus