Të paktën 11 palestinezë kanë humbur jetën nga uria në Rripin e Gazës gjatë 24 orëve të fundit, duke e çuar në 300 numrin e përgjithshëm të viktimave që nga fillimi i luftës, njoftoi zëdhënësi i Kombeve të Bashkuara, Stephane Dujarric.

Në një konferencë për shtyp në selinë e OKB-së, Dujarric tha se situata humanitare në enklavën palestineze vazhdon të përkeqësohet. Ai shtoi se rreth 5,000 persona janë zhvendosur nga pjesa veriore e Rripit të Gazës drejt Deir al-Balah në qendër dhe Khan Younis në jug që nga 20 gushti.

Sipas tij, edhe 8,000 të tjerë janë zhvendosur në perëndim të qytetit të Gazës, duke e çuar numrin total të zhvendosjeve të reja, që nga përfundimi i armëpushimit në mes të marsit, në mbi 800,000, raporton The Times of Israel.