Pas takimeve maratonë si fillim me kreun e kremlinit Vladimir Putin e më pas me homologun e tij ukrainas Volodymir Zelensky, Presidenti i SHBA-ve, Donald Trump u shpreh se vendi i tij mund të ofrojë mbështetje ajrore për arritjen e një marrëveshje paqeje në Ukrainë.

“Kur bëhet fjalë për sigurinë, evropianët janë të gatshëm të dërgojnë njerëz në terren. Ne jemi të gatshëm t’i ndihmojmë ata me gjëra të ndryshme, veçanërisht, ndoshta… nga ajri”, tha Trump.

Ndërsa u pyet nëse në takime pati diskutime për shkëmbim territoresh, kryesisht për Donbasin, ai u përgjigj: Nuk është një luftë që duhej të kishte filluar. Nuk mund  të luftosh me  një komb që është 10 herë më i madh se ti.  Një pjesë e madhe e territorit është marrë dhe ai territor është marrë. Tani po flasin për Donbasin, por Donbasi tani, siç e dini, është 79% në pronësi dhe kontrollohet nga Rusia. Pra, ata e kuptojnë se çfarë do të thotë kjo.

Por pavarësisht përpjekjeve për paqe, presidenti ukrainas Volodymyr Zelensky ka deklaruar se Rusia së fundmi  ka sulmuar sërish vendin e tij, ndërsa ka bërë thirrje që të shtohet presioni ndaj Moskës.

“Mbrëmë, një sulm me dron në Okhtyrka në rajonin Sumy plagosi 14 persona. Një familje me fëmijë të plagosur, 5 muajsh, 4 vjeç dhe 6 vjeç, kërkoi ndihmë pas sulmit. Në Kostiantynivka, rajoni i Donetskut, një sulm me bombë rrëshqitëse dëmtoi pesë ndërtesa apartamentesh dhe të paktën tre persona mbeten ende nën rrënoja”, tha Zelensky.

Ndërkohë garancitë e sigurisë që mund t’i japin Ukrainës në një marrëveshje të mundshme me Rusinë për t’i dhënë fund luftës pritet të diskutohen sërish nga shefat e shtabit të përgjithshëm të vendeve të NATO-s./vizionplus.tv