Mëngjesin e sotëm, rreth orës 04:15 në Shtip, zyrtarë policorë nga SPB Shtip e kanë arrestuar S.Z. (54) nga Shtipi, njoftojnë nga Ministria e Punëve të Brendshme.

Ai dyshohet se rreth orës 02:00, në shtëpinë familjare në Shtip, e ka goditur me një mjet të mprehtë nënën e tij 84-vjeçare, duke i shkaktuar plagë therëse, pas së cilës ajo ka ndërruar jetë.

Mjeku i Ndihmës së Shpejtë ka konstatuar vdekjen, ndërsa me urdhër të prokurorit publik, trupi i të ndjerës është dërguar për autopsi. Ekspertiza në vendngjarje është kryer nga një ekip i SPB Shtip nën drejtimin e një prokurori nga Prokuroria Themelore Publike Shtip, ku është gjetur dhe konfiskuar mjeti i mprehtë për procedura të mëtejshme.

Pas zbardhjes dhe dokumentimit të plotë të rastit, do të parashtrohet kallëzim penal me procedurë të përshpejtuar për veprën penale “vrasje” sipas nenit 123, paragrafi 2, pika 2 e Kodit Penal.