Në Dhomat e Specializuara të Kosovës (DhSK) në Hagë është marrë vendim për pranimin e disa dokumenteve në prova, me kërkesë të Zyrës së Prokurorit të Specializuar (ZPS) në rastin ndaj Hashim Thaçit, Kadri Veselit, Rexhep Selimit dhe Jakup Krasniqit.

Këto dokumente janë pranuar më 29 maj 2025, por vendimi është bërë publik më 25 korrik 2025, raporton “Betimi për Drejtësi“.

Dokumentet e pranuara janë të ndara në tri ankese, e që në ankesin e fundit janë kryesisht dokumente që thuhet se janë marrë nga Shërbimi i Sigurimit Shtetëror të Serbisë, Ministria e Brendshme e Serbisë dhe struktura të tjera të këtij shteti.

Sa i përket aspektit procedural, Prokuroria më 14 prill 2025 kishte paraqitur kërkesë për pranimin e disa dokumenteve që tashmë nuk ishin paraqitur në asnjërën prej kërkesave të dorëzuara në atë kohë.

Prokuroria kishte kërkuar shtimin e një videoje nëntë minuteshe dhe transkriptave të saj në listën e provave, e cila ishte publike që nga marsi i 2023-ës.

Ndërsa, dokumentet e tjera që ishin paraqitur për pranim në prova, Prokuroria kishte thënë se lidhen me akuza të ndryshme në aktakuzë dhe kanë vlerë provuese që nuk tejkalohet nga ndonjë paragjykim, e veç kësaj sipas tyre, mbështeten dhe plotësojnë dëshmitë e dëshmitarëve dhe provave që tashmë janë pranuar.

Mbrojtja e kishte kundërshtuar këtë kërkesë, si dhe kishte shtuar se fakti që kjo kërkesë ishte paraqitur pas dëshmisë së dëshmitarit të fundit të Prokurorisë, kërkohet një qasje më e rreptë ndaj pranueshmërisë dhe trupi gjykues duhet të marrë parasysh se pranimi i tyre shkakton paragjykim për mbrojtjen.

Madje, mbrojtja kishte theksuar se pranimi i këtyre dokumenteve mbi bazën që mbrojtja mund t’i kundërshtojë ato përmes paraqitjes së provave të veta, do të përmbyste barrën e provës dhe do e minonte prezumimin e pafajësisë.

Mbrojtja gjithashtu kishte thënë se artikujt e gazetave që i atribuojnë veprime UÇK-së dhe që nuk citojnë asnjë burim ose nuk i referohen ndonjë informacioni kredibil, nuk kanë asnjë vlerë provuese.

Veç kësaj, mbrojtja pretendon se dokumentet që burojnë nga Serbia kërkojnë vlerësim më rigoroz për të përcaktuar besueshmërinë.

“Shumë nga dokumentet që burojnë nga shteti serb kanë pak ose aspak rëndësi apo vlerë provuese për akuzat në këtë çështje”, theksohet në vendim, të ketë thënë mbrojtja.

Sa i përket videos së kërkuar për t’u përfshirë në listën e provave tashmë të pranuara, trupi gjykues ka thënë se Prokuroria është dashur që ta kërkojë në faza më të hershme dhe se ajo s’ka paraqitur arsye bindëse që tregojnë se pse Prokuroria s’e ka bërë një gjë të tillë.

Si rrjedhojë, u refuzua kërkesa e Prokurorisë për ndryshim të listës së provave të pranuara që si rezultat kanë pranimin e kësaj videoje.

Për artikuj që janë mediatik e që janë dokumente nga 1 deri në 76, trupi gjykues ka thënë se Prokuroria ka treguar se ato lidhen me rolin dhe autoritetin e të akuzuarve brenda UÇK-së dhe Qeverisë së Përkohshme, strukturën e organizimit dhe disa nga krimet që përmenden në aktakuzë. Disa nga këta artikuj, janë dhënë nga vetë të akuzuarit dhe persona të tjerë.

Këto dokumente, sipas trupit gjykues, janë kopje të artikujve nga medie ndërkombëtare dhe vendore që përmbajnë emër autori, burimin mediatik, vendin dhe kohën e publikimit, e disa kanë edhe fotografi origjinale. Disa nga dokumentet e tjera, janë klipe dhe transkripte të tyre me përmbajtje të ngjashme.

Trupi gjykues ka thënë në vendimin e tij se disa nga videot mund të mos jenë mbështetur nga provat ose edhe mund të jenë kundërshtuar nga dëshmitarët që kanë dëshmuar, kjo nuk e pengon pranimin e tyre.

Në vendim, thuhet se disa nga videot ose janë shkarkuar nga Youtube ose janë marrë nga transmetuesit televiziv ose arkivat e tyre. Në disa raste, ka edhe video që janë marrë edhe nga Tribunali Penal Ndërkombëtar për ish-Jugosllavinë. Veç kësaj, thuhet se disa video përmbajnë logo të transmetuesit ose ndonjë logo e transmetuesit është vendosur në video. Po ashtu, thuhet se disa video kanë edhe datën e ngjarjeve që shfaqen në ekran.

Si rrjedhojë, këto prova nga 77 deri në 83 dhe nga 85 deri në 97 janë pranuar në prova materiale.

Mbrojtja kishte kundërshtuar edhe disa prova të propozuara (8 deri në 11) e që Prokuroria ka thënë që janë sekuestruar nga Jakup Krasniqi.

Trupi gjykues ka thënë se mbrojtja pretendon se nuk ishte në dijeni të origjinës së saktë të disa provave të sekuestruara, domethënë që ato janë sekuestruar nga një USB që u gjet në portofolin e Krasniqit. Rrjedhimisht, kundërshtimi i mbrojtjes u hodh poshtë.

Prova e propozuar 1, sipas vendimit, është një libër me titull “Ushtria Çlirimtare e Kosovës – Dokumente dhe artikuj”. Prova 2 është një libër që përmban një intervistë të Fatmir Limajt.

Provat 3 deri në 6 thuhet se janë dokumente të botuara në një medium në Kosovë në vitin 2016 dhe përmban titullin “Arkivat e Luftës” dhe përfshijnë katër vëllime nga 4 janari 1999 e tutje.

Prova 7 thuhet se është një dorëshkrim me autor Jakup Krasniqin me titullin “Kthesa e Madhe”. Po ashtu, edhe prova e radhës thuhet se është një dorëshkrim i përgatitur nga Krasniqi me titull “UÇK-ja në Konferencën Ndërkombëtare të Rambujesë dhe bombardimet e NATO-s”.

Prova 9 thuhet se është një draft nga një dorëshkrim i pabotuar me titullin “Dëshmi për luftën e UÇK-së”. Ai i radhës, ishte një dorëshkrim po ashtu nga Krasniqi me titull “Pa liri nuk ka pavarësi”, e po ashtu edhe një tjetër me titull “Për një shtet sovran. Nuk ka sovranitet pa integritet”.

Disa nga provat e propozuara që mbajnë numrin 12, thuhet se janë fragmente nga një libër me autorësi të Pal Refsdal. Ndërsa, prova 13 thuhet se përmban një intervistë të Veselit.

Prova e 14-të, thuhet se është një libër në të cilin flet Rrustem Mustafa i njohur si Komandant Remi dhe libri i radhës është nga Ilaz Kadolli.

Ngjashëm edhe provat 16, 17 dhe 18, thuhet se janë broshura dhe libra. Si rrjedhojë, trupi gjykues ka gjetur se këto prova nuk tejkalojnë ndonjë efekt paragjykues ndaj mbrojtjes.

“Në dritën e sa më sipër, Paneli është i bindur se Eksponatet e Propozuara 1-18 janë të pranueshme në përputhje me Rregullën 138 (1)”, thuhet në vendim.

Ndërsa, për ankesin tre të kërkesës, thuhet se provat e propozuara nga 1 deri në 14 përbëhen nga raporte të përgatitura nga organizata ndërkombëtare. Disa të tjera kanë origjinë edhe nga Serbia.

“E po ashtu, provat 16, 19, 22, 27, 31, 37, 38, 42 dhe 50 përbëhen nga një vendim dhe disa urdhra të origjinës serbe (“Vendime dhe Urdhra”); (iii) Provat e Propozuara 17, 18, 20, 23, 24, 26, 28-30, 33-36, 39-41, 43-45, 48, 49 dhe 51 përbëhen nga raporte të origjinës serbe (“Raporte Serbe”); (iv) Provat e Propozuara 15, 21, 25, 32, 46, 47 dhe 64 përbëhen nga dokumente të ndryshme të origjinës serbe (“Dokumente të Ndryshme Serbe)”, thuhet në vendim.

Sipas trupit gjykues, këto dokumente lidhen me armiqësitë e vazhdueshme ndërmjet UÇK-së dhe forcave serbe, ekzistencën e një qëllimi të përbashkët kriminal për të marrë në pyetje dhe ndaluar kundërshtarët e perceptuar. Veç kësaj, thuhet se këto dokumente flasin edhe për krime që pretendohet se janë kryer në Prizren, Kleçkë, Gjilan, Cahan, Llapushnik, Zllash, Drenoc, Retimlje, Rahovec, Kukës dhe Budakovë.

Gjithashtu, thuhet se disa nga dokumentet flasin edhe për rolin dhe autoritetin e pretenduar të Krasniqit dhe Veselit brenda UÇK-së dhe Qeverisë së Përkohshme.

Për dokumentet 16 deri në 18, si dhe 20, mbrojtja kishte thënë që i referohen ngjarjeve që bien jashtë periudhës së aktakuzës. Ndërsa, trupi gjykues kishte thënë se janë të rëndësishme për vlerësimin e tyre mbi ekzistencën e një konflikti të armatosur ndërmjet UÇK-së dhe forcave serbe nga të paktën marsi 1998 deri në shtator 1999, siç është paraqitur në aktakuzë, dhe për çështje të lidhura me strukturën dhe opozitën ushtarake.

Ngjashëm kishte konstatuar trupi gjykues edhe për provën e propozuar 61.

“Mbrojtja më tej pretendon se shumica e dokumenteve që vijnë nga autoritetet serbe nuk e përmendin UÇK-në dhe as nuk përmbajnë prova që ndonjë prej individëve të përmendur në ato ka pasur ndonjë lidhje me UÇK-në apo ka vepruar në përputhje me ndonjë politikë të pretenduar. Në këtë aspekt, Paneli vëren se nëse incidentet dhe individët e përmendur në dokumentet përkatëse kanë qenë të lidhur me UÇK-në, do të përcaktohet nga Paneli në fund të gjykimit, duke marrë parasysh tërësinë e provave të pranuara, në përputhje me Rregullën 139 (2)”, thuhet në vendim.

Për provën 39-të, vendimi thotë se mban emërtimin “Departamenti i Sigurimit të Shtetit”.

“Përveç kësaj, Prova e Propozuar 45 është i nënshkruar. Në lidhje me Prova e Propozuara 51, Paneli vëren se ai përbëhet nga [E REDAKTUAR]. Për këto arsye, Paneli është i kënaqur që Raportet Serbe janë prima facie autentike”, thuhet në vendim.

Ndërsa, tek disa dokumente të tjera serbe që kanë numrat, 25, 32 dhe 64, thuhet se janë të datuara, mbajnë një numër reference dhe një titull të Ministrisë së Punëve të Brendshme të Serbisë, dhe identifikojnë autoritetet përkatëse lëshuese. Ngjashëm edhe për dokumentin 46. Kurse, për provën 47, thuhet se përmban shënime mbi takimet e të ashtuquajturës “Komanda e Përbashkët e Kosovës dhe Metohisë”.

“Lidhur me Provat e propozuara 15, Paneli vëren se: (i) faqet K0228232-K0228233 përmbajnë faqet mbuluese të një ditari operativ/lufte; (ii) faqet K0228234-K0228235 përmbajnë dy lista që ofrojnë emrat e oficerëve të ushtrisë dhe shenjat e koduara të përdorura për raportime; dhe (iii) faqet K022-8398-K022-8405 janë të datuara dhe të nënshkruara. Për më tepër, lidhur me provën e Propozuar 47, Paneli vëren se: (i) faqet 03085485-03085513, 03085568-03085569, 03085559-03085561, 03085572-03085575, 03085564-03085565, 03085583-03085585 dhe 03085588-03085589 përmbajnë shënime ditari me shënime mbi takimet e Komandës së Përbashkët të Kosovës dhe Metohisë, të cilat përfshijnë datat kur janë mbajtur takimet përkatëse si dhe emrat e disa prej pjesëmarrësve; dhe (ii) faqja 03085476 përmban faqen mbuluese të ditarit. Për këto arsye, Paneli është i bindur që dokumentet e ndryshme Serbe janë prima facie autentike”, thuhet në vendim.

Disa dokumente thuhet se janë sekuestruar nga UNMIK-u, e që është një ditar i sekuestruar nga banesa e një anëtari të UÇK-së, Naim Kadriu.

Si rrjedhojë, u mor vendim që ZPS-së të mos i lejohet shtimi i videos 84 në prova ekzistuese, nga shtojca 1 u pranuan provat 1 deri në 83 dhe 85 deri në 97. Në shtojcën 2 u pranuan provat nga 1 deri në 18, ndërsa në shtojcën 3 u pranuan në prova dokumentet nga 1-51, 53, 54, 57, 58, 61-64, 66, 67 (faqet 5, 12 dhe 13), dhe 68-80.

Ndërsa, u refuzuan të pranohen provat e shtojcës 3 me numra 52, 55, 56, 59, 60, 65 dhe faqet 7 dhe 9 të provave të propozuara 67.

Ndërkohë, më 15 prill 2025, Prokuroria ka njoftuar se ka përfunduar paraqitjen e provave në këtë rast.

Ndërsa, mbrojtja kishte bërë kërkesë sipas Rregullës 130 e cila parasheh kërkesën për rrëzimin e ndonjë akuze apo akuzave në tërësi në aktakuzë. Vendimi mbi këtë kërkesë ishte marrë me 16 korrik 2025. Sipas kryetarit të trupit gjykues, Charles Smith III, ajo që kishte kërkuar mbrojtja ishte mosmbështetja në pretendime për krime lufte që kanë të bëjnë me incidente që kanë ndodhur para majit të 1998-ës dhe pas 20 qershorit të 1999-ës.

“Trupi gjykues vëren se incidentet dhe ngjarjet që kanë ndodhur në kohën që kundërshtohen prej mbrojtjes nuk janë akuza brenda kuptimit të Rregullës 130”, tha kryetari i trupit gjykues, Charles Smith III.

Si rrjedhojë, ishte rrëzuar ky mocion me arsyetimin se trupi gjykues s’e ka autoritetin për të rrëzuar materiale që përbëjnë akuzat që kanë të bëjnë me shkaqe kohore.

Ndërsa, po të njëjtën ditë, mbrojtja e viktimave kishte paraqitur provat e veta duke thirrur dy dëshmitare eksperte për të dëshmuar njëkohësisht.

Përveç që dëshmuan me 16 korrik 2025, dëshmia e këtyre dy dëshmitarëve vazhdoi edhe më 17 korrik 2025, duke përfunduar kështu edhe marrja e dëshmive të dëshmitarëve të mbrojtjes së viktimave.

Zyra e Prokurorit të Specializuar, më 30 shtator 2022 ka dorëzuar aktakuzën e konfirmuar të ndryshuar ndaj Hashim Thaçit, Kadri Veselit, Jakup Krasniqit dhe Rexhep Selimit, e cila përbëhet nga dhjetë pika me akuza, ku këta të fundit ngarkohen për krime lufte e krime kundër njerëzimit.

Më 29 prill 2022, Zyra e Prokurorit të Specializuar kishte dorëzuar një aktakuzë të ndryshuar ndaj Hashim Thaçit, Kadri Veselit, Rexhep Selimit e Jakup Krasniqit, ku pretendohet se katër të akuzuarit kanë kryer krime lufte edhe në Gjilan, Budakovë e Semetishtë.

Më 9 nëntor të vitit 2020, në paraqitjet e tyre të para, Jakup Krasniqi e Hashim Thaçi janë deklaruar të pafajshëm për akuzat që u vihen në barrë. Njëjtë është deklaruar edhe Veseli në paraqitjen e tij më 10 nëntor, sikurse edhe Rexhep Selimi më 11 nëntor.

Aktakuza ndaj Hashim Thaçit, Kadri Veselit, Rexhep Selimit dhe Jakup Krasniqit është konfirmuar më 26 tetor 2020.