Skënder Sallaku jetoi një jetë me të qeshurën dhe bëri të qesh publikun e tij. Edhe makinacionet e regjimit komunist, ai i mundi me të qeshura.

Emblema e varietes së Tiranës, lindi më 25 janar 1935, në Tiranë, ishte një nga aktorët e njohur të humorit, po ashtu ishte ish-kampion kombëtar në mundjen klasike, autor skeçesh e parodish. Ka mbaruar Institutin e Lartë të Kulturës Fizike “Vojo Kushi” dhe ka kryer një kualifikim një vjeçar në Kinë, pranë cirkut të Pekinit. Fillimisht filloi punë si profesionist në Estradën e Kufirit, më pas si klloun akrobatik në cirk, duke dhënë një kontribut të papërsëritshëm në ecurinë e këtij profili sa të vështirë aq edhe të bukur. Figura emblematike si Skënder Sallaku do të jenë shembull frymëzimi për brezat e rinj të aktorëve komikë, atyre që më shumë se të na bëjnë të qeshim, ata duan të na dhurojnë çaste relaksi dhe balsam shërimi.

Me më shumë se 1000 role në skenë dhe ekran, si një interpretues brilant i parodive dhe skeçeve, ai është një thesar i vërtetë për trashëgiminë artistike. Aktori ka lënë një ndikim të madh në skenën artistike shqiptare, në veçanti në rolet e tij në “Gaz dhe punë”, “Ditari i një bojaxhiu”, “Ekipi”, “Dosja jonë”, “Kur hiqen Maskat”, “Estrada në ekran” dhe shumë të tjera. Ai është vlerësuar me disa tituj dhe nderime si “Artist i Merituar”, “Artist i Popullit”, dhe “Mirënjohja e Qytetit”. Shkrues dhe interpretues brilant i skeçeve dhe parodive, askujt nuk do t’i shkonte në mënd se ai burri shtatshkurtër pati ëndërr të bëhej balerin ku dhe aspiroi në fillimet e tij. Ai ishte edhe kampion kombëtar i mundjes klasike.

Karriera e artistit zgjati për më tepër se gjysmëshekulli, ku falë aftësive të tij të shkëlqyera plastike, pantomimike etj., interpretoi në më tepër se 1000 role në skenë dhe ekran, të cilat do të mbeten gjatë në kujtesën e artdashësve dhe si një thesar për trashëgiminë artistike, kryesisht në zhanrin e komedisë. Një karrierë 52-vjeçare ishte jo vetëm një jetë në skenë, por e përjetuar me pasion dhe përgjegjësi të lartë, obliguese, jo vetëm ndaj spektatorit që e priti dhe e përcolli në qindra shfaqje me duartrokitje dhe ovacione, por edhe ruajtja e atij ekuilibrit të brishtë të ideologjisë dhe censurës që përgjonte me sy skifteri skenën e humorit. Të bëje art në diktaturë ishte një heroizëm. Aktori dhe komediani Sallaku u largua nga kjo jetë me 11 shkurt të vitit 2014 në Tiranë. Ai mbylli sytë në moshën 79-vjecare një prej ikonave të humorit. Sallaku vuante prej kohësh nga një sëmundje e rëndë.

Skënder Sallaku është konsideruar si një nga aktorët me te mirë të humorit. Ai ishte një nga artistët më të dashur për çdo qytetar të këtij vendi pavarësisht moshës. 8 vite pas ndarjes nga jeta të Skënder Sallakut, bashkëshortja Vitorja iu bashkua dashurisë së madhe të jetës së saj në të përtejmen botë. U largua në heshtje e me dinjitet në moshën 80-vjeçare “Artistja e merituar” e “Mjeshtrja e madhe” e ishCirkut të Tiranës… Një histori sfiduese jeta e Vitores, me pushkatimin e të atit në diktaturë. E specializuar në Kinë e Bashkimin Sovjetik Sallaku dha shembullin e një akrobateje “par excellence”. Ndërsa la pas edhe disa libra me autorësinë e saj, mes të cilëve edhe një monografi dedikuar bashkëshortit të saj, Skënderit./Gazeta Panorama