Një incident i rëndë ka ndodhur në Zlatibor të Serbisë gjatë finales së Kampionatit Evropian të Boksit për të Rinj, ku është sulmuar fizikisht gjyqtari nga Maqedonia e Veriut, Stefan Czubalevski, nga një trajner i kombëtares së Azerbajxhanit.

Incidenti ndodhi gjatë ndeshjes në kategorinë deri në 75 kilogramë, ku përballë ishin boksieri nga Azerbajxhani, Jusuf Agakishiev, dhe përfaqësuesi i Serbisë, Viktor Majstoroviç.

Sipas raportimeve, fillimisht trajneri nga Azerbajxhani e ka ofenduar verbalisht gjyqtarin Czubalevski, por situata doli jashtë kontrollit kur ai hyri në ring, e kapi gjyqtarin për fyti dhe nisi ta godasë.

E gjithë ngjarja ndodhi para tribunave të mbushura me fëmijë — pjesëmarrës në garë apo thjesht spektatorë — duke shkaktuar tronditje dhe kaos.

Menjëherë pas incidentit, ndeshja u ndërpre, boksieri nga Azerbajxhani u diskualifikua, dhe medalja e artë iu dha boksierit serb, Viktor Majstoroviç.

Ky incident ka shkaktuar reagime të ashpra në komunitetin sportiv dhe pritet ndërhyrje urgjente nga federatat përkatëse për të garantuar sigurinë në garat sportive.

Videon ndiqeni nga minuta 3:31:00