Në 7-vjetorin e ndarjes nga jeta të Adem Demaçit, ikonës së rezistencës kombëtare shqiptare, nënkryetari i Aleancës për Shqiptarët, Remzi Mehmedi, ka ndarë një nga thëniet më të fuqishme të Bacës Adem, që pasqyronte përkushtimin dhe sakrificën e tij të jashtëzakonshme për kauzën kombëtare. “A kishe frikë nga vdekja?” – ishte pyetja që shpesh i drejtohej Demaçit. Dhe përgjigjja e tij mbetet po aq e fortë sot: “Unë kisha vdekur disa herë, që ditën kur vendosa t’i përkushtohem çështjes kombëtare në ato kohëra dhe kundër atij sistemi.” Mehmedi përmes këtij kujtimi thekson se Baca Adem nuk ishte thjesht një aktivist politik, por një simbol i gjallë i qëndresës, një njeri që sfidoi diktaturën dhe pagoi çmimin më të lartë për lirinë dhe të drejtat e shqiptarëve. Adem Demaçi, i quajtur shpesh “Mandela i Ballkanit”, kaloi 28 vite në burgjet e Jugosllavisë për bindjet e tij politike dhe përkushtimin ndaj çështjes shqiptare. Ai u nda nga jeta më 26 korrik 2018, por kujtimi dhe ideali i tij mbeten të gjalla ndër breza.