Sot shënohen 7 vite nga ndarja nga jeta e Bacës Adem Demaçi, simbolit të qëndresës shqiptare dhe një prej figurave më të shquara të luftës për liri dhe të drejta kombëtare. Me këtë rast, kryetari i BDI-së, Ali Ahmeti, ka kujtuar me respekt figurën e Demaçit, duke e cilësuar atë si zërin e ndërgjegjes kombëtare dhe shembullin e pastër të sakrificës për liri. “Rruga e tij e mundimshme, por e drejtë, i dha kuptim qëndresës sonë dhe frymëzoi breza të tërë në kërkim të lirisë, drejtësisë dhe dinjitetit kombëtar,” shkruan Ahmeti në mesazhin e tij përkujtimor. Ai shton se ka pasur nderin dhe krenarinë të veprojë krah për krah me Bacën Adem në kohët më të vështira dhe më të lavdishme të historisë sonë, për të njëjtin ideal. "Emri dhe vepra e tij do të jetojnë përgjithmonë në kujtesën e popullit tonë", përmbyll Ahmeti. Adem Demaçi, i njohur si "Mandela i Ballkanit", kaloi 28 vite në burgjet jugosllave për veprimtarinë e tij politike dhe qëndrimin e palëkundur për të drejtat e shqiptarëve. Ai u nda nga jeta më 26 korrik 2018, në moshën 82-vjeçare.