Kryetarja e Qytetit të Shkupit, Danella Arsovska, ka publikuar një postim thumbues ndaj qeverisë dhe Aleancës për Shqiptarët, duke e ironizuar mbrojtjen që i bëhet Visar Ganiut, kryetar i Komunës së Çairit dhe një nga figurat më të përfolura për keqpërdorime.

Në një postim në Facebook, Arsovska ka shpërndarë një fotografi ku shfaqet Visar Ganiu përkrah Orce Gjorgjievskit – kandidatit të VMRO-DPMNE-së për Qytetin e Shkupit – duke shtruar pyetjen: Pse për 5 muaj rresht e mbrojnë trimërisht komitën Visar Ganiu, në një foto?

Ajo shton me ironi: Ndërkohë vazhdon ndërtimi, vjedhja dhe sigurisht – gënjeshtra.

Duke thumbuar qytetarët që paguajnë rregullisht taksa dhe skanojnë faturat, Arsovska shkruan: Ju paguani taksa dhe skanoni fatura, që komshiu të ketë falas ujë e rrymë. Shëndet kafeja dhe punë të mbarë në javë.

Ky reagim vjen në kohën kur po rritet presioni publik për hetim ndaj punës së ish-kryetarëve të komunave. Arsovska, me këtë postim, duket se godet edhe pazaret politike në sfond që, sipas saj, po mbulojnë skandale konkrete të korrupsionit.