Në moshën 36-vjeçare ka ndërruar jetë kitaristi i shquar nga Maqedonia, profesori dhe kompozitori Kristijan Vollçev, duke lënë një boshllëk të madh në skenën muzikore dhe në edukimin artistik, përcjell TV21.

I lindur në Shkup në vitin 1988, Volçev ishte profesionist në kitarë klasike (në shkollën “Nikola Karev”), por rrugëtimi i tij muzikor nuk përfundoi aty. Me krijimtarinë dhe interpretimet e tij, ai u shndërrua në një urë lidhëse mes virtuozitetit klasik dhe shprehjes muzikore moderne, duke bashkuar traditën me inovacionin.

Ai punoi si profesor i kitarës klasike, duke mentoruar gjenerata të tëra muzikantësh të rinj me përkushtim, pasion dhe një kuptim të thellë të muzikës.
Përveç skenës klasike, Volçev la gjurmë edhe në muzikën alternative rock si kitarist i grupit “Grey” (Grej).

Veçanërisht u dallua për aranxhimet e tij të këngëve tradicionale maqedonase, si “Jovano Jovanke”, “So maki sum se rodila” e të tjera, të cilat i prezantonte me ndjeshmëri të thellë dhe respekt autentik për rrënjët kulturore, duke u dhënë një tingull të ri dhe freski moderne.

Në vitin 2022 publikoi albumin “Synesthesia Live In Skopje” – një projekt që bashkonte teknikën klasike me tinguj krossover dhe që mbeti i njohur si një vepër artistikisht kreative dhe teknikisht e përsosur, shumë e dashur për fansat dhe kolegët e tij.

Vollçev ishte një mysafir i shpeshtë në emisionin “Urban Tag” në TV21, ku ndante përvojat e tij, pikëpamjet muzikore dhe mesazhe frymëzuese për artin dhe jetën. Me talentin, kulturën dhe modestinë e tij, ai la një gjurmë të thellë në media dhe në botën akademike.