Pas Anita Takes dhe shumë emrave legjendarë të muzikës, “Kënga Magjike” riktheu në skenë edhe Nexhmije Pagarushën. Një tjetër sfidë për producentin e festivalit dhe drejtuesin e së “Dielës Shqiptare” në Tv Klan, Ardit Gjebrean, pasi njësoj si Anita Take, edhe ylli i Kosovës refuzonte kategorikisht.

Gjebrea kujton sesi u nis për në Kosovë për ta takuar dhe për ta bindur, duke zbuluar për herë të parë  edhe fjalët e Pagarushës.

Ardit Gjebrea: Nuk donte të vinte. Ishte mbyllur në shtëpinë e saj, nuk dilte dhe refuzonte çdo njeri. Më ka lënë gjysmë ore pas dere, kam qenë me regjisorin Pali Kuke dhe nuk e hapte derën.

Aurela Gaçe: Vërtet?

Ardit Gjebrea: Po, sepse kisha folur disa herë me të në telefon, i kisha thënë që të ftoj dhe më thoshte “Ardit, të lutem, më lër”. I thashë shiko, unë do të vij në Kosovë, unë nuk të ndahem. Kur i rashë derës, ajo më tregonte që erdhi, pyeti kush është, unë i thashë jam Ardit Gjebrea dhe më tregonte që “u mbështeta pas dere, rashë në gjunjë dhe nuk po mblidhja dot më veten.” U desh kohë që ta hapte derën.

Jonida Maliqi: Vdiqa! Nuk e di! Brenda pak minutash, mishi im është bërë mornica-mornica.

Ardit Gjebrea: Dhe nuk pranonte, i thashë okej, unë kërkoj vetëm të hamë një darkë bashkë. “Unë nuk dal nga shtëpia”, tha. I thashë të paktën bëje për mua se kam ardhur që nga Tirana. E binda, bashkë me  Palin shkuam për darkë dhe ajo nuk e dinte që unë kisha organizuar mbi 30 artistët më të mirë të Kosovës, të cilët surprizë prisnin Nexhmije Pagarushën duke shkruar “Mirë se vjen, bylbyl i Kosovës!”

Në ekran, shfaqet momenti kur Nexhmije  Pagarusha hyn në lokal, e shtangur nga surpriza.

“Pastaj erdhi dhe këndoi në skenë pas shumë vitesh këtë duet me mua”, thotë Gjebrea ndërsa shijojmë edhe njëherë “Kur një ditë të kthehesh ti” që ata e performuan në vitin 2000.