Forca e Sigurisë së Kosovës ka realizuar ushtrimin fushor “Tango Mike”, në kuadër të përgatitjeve për validimin e Regjimentit të Tretë të Këmbësorisë.

FSK në një postim në Facebook ka publikuar fotografi nga ky ushtrim fushor.

“Në kuadër të përgatitjeve për validimin e Regjimentit të Tretë të Këmbësorisë, Kompania e Armëve ka realizuar ushtrimin fushor ‘Tango Mike’, me qëllim  vlerësimin e kapaciteteve operacionale dhe aftësive taktike të togjeve, si dhe testimin e funksionimit të komandës dhe ndërlidhjes në kushte të ngjashme me ato reale të betejës.

Në këtë ushtrim janë validuar togjet e kompanisë, duke u vlerësuar në aspektin e dislokimit në terren, lëvizjes taktike, vendosjes në pozicione mbrojtëse dhe mbështetje më zjarre për njësitë operacionale të këmbësorisë”, shkruajnë nga FSK-ja.