Presidenti ukrainas Volodymyr Zelensky tha se "nuk mund të garantojë sigurinë" e liderëve ndërkombëtarë që do të jenë mysafirë të Vladimir Putin në Moskë, për paradën që shënon 80 vjetorin e fitores sovjetike në Luftën e Dytë Botërore më 9 maj.

"Nuk dihet se çfarë synon të bëjë Rusia në atë datë. Mund të marrë masa të ndryshme, të tilla si zjarre ose shpërthime, dhe pastaj të na fajësojë ne." Duke folur me gazetarët, Zelensky tha gjithashtu se "nuk ka ndërmend të luajë lojëra, duke krijuar një atmosferë të këndshme për t'i lejuar Putinit të dalë nga izolimi më 9 maj", dhe rilançoi propozimin për një armëpushim 30-ditor.

Sipas Zelensky-t, qasja e Donald Trump ndaj luftës në Ukrainë filloi të ndryshojë pas takimit dypalësh në Shën Pjetër, me rastin e funeralit të Papa Françeskut, krahasuar me përplasjen në Shtëpinë e Bardhë në fund të shkurtit. “Jam i bindur se pas takimit tonë në Vatikan, Presidenti Trump filloi t’i shihte gjërat pak më ndryshe. Sidoqoftë, ky është këndvështrimi i tij, vendimi i tij”, tha Zelensky.

Rusët sulmuan qytetin e Kharkivit në verilindje të Ukrainës gjatë natës, duke plagosur të paktën 51 persona, përfshirë dy vajza adoleshente, duke përdorur bomba termobarike, të cilat krijojnë një valë shoku me temperaturë shumë të lartë. Kështu raportoi zyra e prokurorit rajonal të Kharkivit këtë mëngjes, e cituar nga mediat ukrainase. Të paktën shtatë shpërthime ndodhën në pjesë të ndryshme të qytetit, ku shpërthyen zjarre të shumta, shkruan faqja ukrainase e internetit, sipas së cilës rusët përdorën të paktën 15 dronë, ndoshta të ngarkuar me këtë lloj arme.