Me mbështetjen dhe në bashkëpunim me Shoqatën e Gazetarëve të Maqedonisë dhe Kryqin e Kuq të Qytetit të Shkupit, sot (30.04.2025) një numër i madh gazetarësh dhe punonjësish mediatikë, si dhe qytetarë, dhuruan gjak në disa lokacione, përfshirë ambientet e Qendrës Ditore për Dhurim Gjaku të Kryqit të Kuq të Qytetit të Shkupit (DHO Dare Xhambaz), si dhe në Qendrat Klinike në Shtip dhe Manastir, transmeton Portalb.mk.

Për të tretin vit radhazi, SPGPM po shënon Ditën Botërore të Lirisë së Shtypit me një fushatë dhurimi gjaku, duke iu bashkuar kështu festimit global të organizuar nga UNESCO, si dhe Federata Ndërkombëtare e Gazetarëve.

UNESCO e shënon këtë ditë nën sloganin “Raportimi në një botë të re të guximshme – Ndikimi i Inteligjencës Artificiale në Lirinë e Medias”, duke treguar kështu një sërë sfidash me të cilat përballen mediat dhe gazetarët si rezultat i progresit të shpejtë teknologjik, i cili ka një ndikim serioz si në raportim ashtu edhe në zhvillimin e proceseve demokratike.

Si kurrë më parë në shekullin e 21-të, gazetaria dhe liria e fjalës janë nën presion, jo vetëm nga grupe të ndryshme interesi, qeveri, politikanë, por edhe nga kompani të mëdha teknologjike.

Kryetari i SÇGPM-së, Pavle Belovski, tha se gazetarët në Maqedoni punojnë në kushte të vështira, nën presion serioz, kërcënime dhe sulme, si dhe me të ardhura të ulëta dhe sfida serioze që lidhen me situatën socio-ekonomike.

“Vetëm gazetarët dhe punonjësit e medias solidarë dhe të ndërgjegjshëm shoqërisht mund të jenë roje të interesit publik dhe ta informojnë profesionalisht publikun, gjë që është baza për zhvillimin e një shoqërie demokratike. Ne mbetemi në mendimin se në këtë botë të re, vetëm gazetaria profesionale dhe etike mundet dhe është mbrojtja më e mirë kundër dezinformimit dhe lajmeve të rreme. Meqenëse nesër është 1 maji, sot nuk do të flas shumë për situatën e gazetarëve dhe punonjësve të medias, por sot në Maqedoni, megjithëse liria e shprehjes duket se ekziston, ajo është nën kërcënime serioze delikate që rrjedhin nga presionet nga qendrat e pushtetit, gjendja e dobët financiare e medias, zhvillimi i shkretëtirave mediatike në një pjesë të madhe të territorit të vendit, kërcënimet ndaj gazetarëve dhe punonjësve të medias, veçanërisht në hapësirën online”, tha Belovski.

Ai shtoi se me këtë veprim duam të tregojmë se “gazetarët dhe punonjësit e medias janë një pjesë e rëndësishme e kësaj shoqërie, se janë solidarë dhe se e ndiejnë zërin e të pafuqishmëve, të qytetarëve”.

“Gjithashtu duam t’ia kushtojmë aksionin e këtij viti solidaritetit, bashkimit dhe empatisë, dhe me këtë të tregojmë respekt për viktimat e tragjedisë që ndodhi në Koçan muajin e kaluar”, tha Belovski.

Kryetari i SHGM-së, Mladen Çadikovski, foli edhe për kushtet në të cilat punojnë gazetarët dhe shtoi:

“Gazetaria është një profesion që ka një mision të veçantë, të mbrojë interesin publik dhe të jetë ndërgjegjja dhe zëri i komunitetit. Sot, me këtë aksion për dhurimin e gjakut, po dërgojmë një mesazh të fortë – se jemi këtu për njëri-tjetrin”, tha Çadikovski.

Aleksandra Valkanovska, nga Kryqi i Kuq i Qytetit të Shkupit, shprehu mirënjohje për aksionin human, duke theksuar punën e gazetarëve dhe punonjësve të medias si një element të rëndësishëm në shoqëri.

“Mënyra se si po e shënoni këtë ditë është e mrekullueshme. Është vërtet kënaqësi që keni njohur humanizmin, solidaritetin dhe mbështetjen e të tjerëve përmes aktit të dhurimit të gjakut në ditën që është juaja, e gazetarëve, e lirisë së medias dhe e të gjithë juve anëtarëve të sindikatës së punonjësve të medias”, tha Valkanovska.