Një letër e shkruar me dorë nga Napoleoni, ku ai mohon përfshirjen në rrëmbimin e Papa Piut të VII-të në vitin 1809, del në ankand këtë fundjavë, si një kujtesë e marrëdhënieve të ndërlikuara mes Francës dhe Vatikanit në të kaluarën.

Letra, e nënshkruar “Napoleon”, del në shitje të dielën, një ditë pas funeralit të Papa Françeskut, i cili ndërroi jetë në fillim të kësaj jave. Papa Piu i VII-të u rrëmbye nga forcat franceze në apartamentin e tij privat në Pallatin Kuirinale në Romë, aktualisht pallati presidencial në Itali dhe qëndroi i burgosur nga Napoleoni për pesë vjet.

Kreu i Kishës Katolike asokohe ishte përpjekur të ruante autoritetin e Vatikanit mbi Kishën franceze dhe u rezistoi  përpjekjeve të Napoleonit për të ushtruar kontroll mbi klerin. Në letrën drejtuar fisnikut dhe aleatit francez Zhon Zak Rezhi dë Kombasere, Napoleoni shfaqet sikur nuk ka dijeni për ndalimin e Papa Piut të VII- të.

“Ishte pa urdhrin dhe kundër vullnetit tim që Papa u nxor nga Roma; po ashtu, është sërish pa urdhrin dhe kundër vullnetit tim që ai po sillet në Francë,”- shkruante perandori francez. “Unë u informova për këtë ngjarje 10 apo 12 ditë pasi kishte ndodhur.”- thuhet në letrën e Napoleon Bonapartit.

 Letra sipas Shtëpisë së Ankandeve Ozena kap një vlerë nga 12 mijë deri në 15 mijë euro dhe do të shitet në Fontenëblo, në jug të Parisit, aty ku Papa Piu i VII-të u mbajt i burgosur, pasi fillimisht qëndroi në Savona të Italisë.

/RTSH/