Mundësi ruso-shqiptar Chermen Valiev u shpall kampion i Evropës në Kampionatin Evropian që u zhvillua disa ditë më parë në Bratislavë të Sllovakisë, teksa në momentin e ndarjes së medaljeve ai u has me një situatë aspak normale.

26-vjeçari që përfaqëson Shqipërinë u ndesh me fyerjet dhe sharjet e presidentit të Federatës Ruse të Mundjes, Mikhail Mamiashvili.

Ky i fundit i tha mundësit kuqezi që është një tradhtar. Kjo, pasi ai zgjodhi vendin tonë dhe në finale mposhti pikërisht një sportist rus.

“Më quajti tradhtar të atdheut. Isha i hutuar”, ka thënë Valiev për median ruse “Match TV” të enjten.

Ai është pyetur nëse ka pasur takim pas skandalit në ceremoninë e ndarjes së çmimeve.

Mamiashvili gjatë ndarjes së medaljeve, iu afrua Valievit dhe shkëmbeu disa fjalë me të. Më pas i vuri në mënyrë të vrazhdë dhe më pas me forcë e kapi për duarsh.

“Unë iu afrova atij, por organizatorët nuk më lejuan”, ka theksuar Valiev.

Valiev në qershor të vitit 2024 vendosi të përfaqësojë Shqipërinë, ku sukseset nuk i kanë munguar.

“Kur vendosa të paraqitem për një vend tjetër (Shqipërinë), respektova të gjitha procedurat ndërkombëtare. Gjithçka ishte zyrtarisht e firmosur.

Kam paguar një tarifë prej pesë mijë eurosh për Federatën Ndërkombëtare të Mundjes dhe pesë mijë euro për Federatën Ruse të Mundjes”, tregon ai.