Xherdan Shaqiri, ish-lojtar i Bayernit dhe Interit, ka dhënë një intervistë për ‘Gazzetta dello Sport’ në prag të çerekfinales së sotme të Ligës së Kampionëve mes dy ish-skuadrave të tij:

“Duke qenë se kam luajtur për të dyja klubet dhe kam përjetuar momente të mëdha si me Interin ashtu edhe me Bayernin, është një pyetje e vështirë për mua. Nuk mund të bëj një ‘parashikim’. Do të mbështes thjesht skuadrën më të mirë.”

A mund të fitojë Interi tripletën?

Shumë e vështirë, por jo e pamundur. Për të arritur një objektiv të tillë, të duhet një sezon perfekt dhe me siguri edhe një dozë e mirë fati. Por Interi ka një skuadër shumë të mirë dhe një shpirt fantastik, ndaj nuk përjashtohet si mundësi.

Bayerni ka gjysmën e skuadrës të dëmtuar...

Ky është një aspekt që mund të ketë ndikim, sidomos sepse mbrojtja e bavarezëve ishte ndërtuar mirë. Por Bayerni ka shumë cilësi edhe në stol. Të themi që mungesat mund të ndikojnë, por nuk duhet të jenë vendimtare.