E njohur si “Ura e Zogut”, monumenti i Kulturës, e para vepër infrastrukturore publike në Shqipëri tashmë është kantier i ndërhyrjes emergjente.

Ministri i Ekonomisë, Kulturës dhe Inovacionit, Blendi Gonxhja, ka vizituar punimet e fazës së parë të Urës së Matit. Ka bërë të ditur se faza e parë e punimeve përfshin përforcimin e këtij monumenti kulture dhe më pas do të pasohet me restaurimin thelbësor.

“Sot, ky monument kulture, në listën e pasurive në rrezik nga ‘Europa Nostra’ i është nënshtruar falë financimit nga Qeveria shqiptare, një ndërhyrjeje shpëtuese, si fazë e parë përforcuese dhe në vijim pason restaurimi thelbësor, ku ekspertët po verifikojnë thellësinë e zhytjes së themelit dhe ndërthurjen e strukturës mbajtëse të çeliktë me këmbën e urës, veçanërisht për shkak të ndërtimit në mjedis me ujë dhe për shkak të cedimit dhe animit të këmbës së urës”, citohet të ketë thënë ai.

Në prillin e vjetëm Qeveria e Shqipërisë kishte miratuar fondin prej 57,5 milionë lekësh (mbi 50 mijë euro) për ndërhyrjen emergjente në Urën e Zogut.

“Në mbledhjen më të fundit të Qeverisë u miratua fondi prej 57,5 milionë lekësh, që mundëson zbatimin e projektit për ndërhyrjen emergjente në të këtë objekt, i cili pësoi dëmtime të rënda, për shkak të reshjeve të disa muajve më parë. Ka qenë një proces intensiv pune, me shkëmbime idesh, punë në terren, çka nuk ka qenë aspak e lehtë për shkak të kushteve të vështira atmosferike”, shkruhej në njoftim ku bëhej e ditur se pas miratimit në Këshillin Kombëtar të Trashëgimisë Kulturore Materiale të projektit të ndërhyrjes emergjente në Urën e Matit, nën kujdesin e zëvendëskryeministres, Belinda Balluku, u mblodh dhe u angazhua Komiteti Mbrojtjes Civile, me qëllim sigurimin e fondit të nevojshëm për zbatimin e tij.

Ministria e Kulturës ka pasur takime dhe konsultime të vazhdueshme edhe me përfaqësuesit e “Europa Nostra”, të cilët janë treguar të gatshëm për të dhënë ndihmën e tyre, duke shprehur konsiderata për këtë operacion të ndërmarrë përgjatë muajve të fundit.

Miratimi i këtij fondi, jo vetëm mundëson ndërhyrjen emergjente, por krijon kushtet për zgjidhjen përfundimtare të problematikës në Urën e Matit.

Ura e Matit është inauguruar më 26 maj 1927 dhe është projektuar nga inxhinieri zviceran, Erwin Schnitter. Është e ndërtuar me gjashtë harqe, secili nga 54 metra i gjatë. E ndërtuar me çimento dhe hekur në një sistem nga më modernët për ndërtime urash (për atë kohë), edhe sot e kësaj dite nuk e ka humbur bukurinë dhe vlerën. Por ka vite që ka qenë e rrezikuar dhe pa ndërhyrje. Ekspertët ka disa vjet që kanë alarmuar se Ura e Zogut po humbet vlerat unike arkitekturore.